Eth president dera Generalitat liure a Maria Pilar Busquets era Crotz de Sant Jordi a títol postum
Eth president dera Generalitat de Catalonha, Carles Puigdemont, liurèc agèr dimèrcles, 3 de mai, era Crotz de Sant Jordi a 29 personalitats e 24 entitats, un guerdon qu’arreconeish es servicis prestadi en Catalonha ena defensa dera sua identitat o, mès generauments, en plan civic e culturau. Er acte, que se celebrèc en Salon Sant Jordi deth Palai dera Generalitat, tanben compdèc damb era assisténcia dera presidenta deth Parlament, Carme Forcadell, deth conseller de Cultura, Santi Vila, e de diuèrsi membres deth Govèrn.
Era Crotz de Sant Jordi ei ua des maximales reconeishences que pòt arrecéber ua persona per part dera Generalitat de Catalonha. Era distincion se creèc eth 1981 damb era fin de distingir es persones naturaus o juridiques que, pes sòns merits, agen prestat servicis destacadi en Catalonha. Quinsevolh ciutadan, grop de ciutadans o entitat pòt demanar que s’autrege aguest guerdon a bèra persona, ja sigue fisica o juridica.
Entre es premiadi, eth Govern dera Generalitat de Catalonha concedic a títol postum era Crotz de Sant Jordi a Maria Pilar Busquets e Medan, activista culturau e politica. Peth sòn papèr ena recuperacion des institucions araneses e des simbèus d’identitat dera Val d’Aran e pera sua defensa des ligams istorics e culturaus damb Catalonha. Coma deputada en Parlament catalan siguec ponenta dera lei deth regim especiau d’Aran. Posterioraments siguec sindica d’Aran, en tot èster era prumèra hemna qu’aucupaue aguest cargue dempús dera sua institucion, a principis deth sègle XIV. Trabalhèc pera normalizacion der usatge der occitan aranés, lengua que cultivèc coma escrivana.
Maria Pilar Busquets, que moric eth passat 13 de noveme de 2016, auie participat pòqui mesi abans amassa damb eth sindic d’Aran, Carlos Barrera, enes actes de commemoracion deth 25au aniversari dera reinstauracion deth Conselh Generau d’Aran en un acte institucionau en Parlament de Catalonha.
Era crotz de Sant Jordi de Maria Pilar Busquets la remassèc eth sòn hilh, Jusèp Boya i Busquets e compdèc damb era preséncia deth sindic d’Aran, Carlos Barrera.
Pendent er acte, Puigdemont, manifestèc: “Premiam as nòsti melhors exemples e ac hèm capinauti des dera transversalitat, era reconeishença e era gratitud dera gent deth país cap a toti vosati”, eth president soslinhèc: “Un país que non arreconeish era vàlua dera sua gent non va enlòc, e nosati auem un camin mercat e sabem a on volem anar”.
Puntuació: 4,00 de 5 - 1 Vots
Carregant ... - 1.042 visites[ Valora aquesta informació fent clic als estels ]
Si t'agrada aquest canal informatiu subscriu-te al RSS !
NOTA: El comptador de visites està actiu des de 02-2016
