Convèni entre eth Conselh Generau d’Aran e era Acadèmia aranesa dera lengua occitana (AALO)
- Eth Conselh Generau d’Aran collaborarà damb era AALO ena elaboracion d’un Diccionari de Concèptes.
Eth sindic d’Aran, Carlos Barrera, e eth president dera Acadèmia aranesa dera lengua occitana (AALO), Jusèp Loís Sans, an signat un convèni entà garantir eth foncionament dera AALO. Er acte a compdat tanben damb era preséncia deth vicesindic d’Aran, Luis Carlos Medina, e des membres dera AALO: Angelina Cases, Rosa Ma Salgueiro e Jèp de Montoya.
Damb aguest convèni, eth Conselh Generau d’Aran se compromet a realizar es següentes accions:
- Dar ajuda entath foncionament ordinari dera AALO.
- Collaborar damb era AALO.
- Collaborar damb era AALO ena elaboracion d’un Diccionari de Concèptes damb era facilitacion des servicis de reprografia deth Conselh Generau entad aguest ahèr.
Pera sua part, era Acadèmia aranesa dera lengua occitana (AALO) se compromet a realizar es accions següentes:
- Continuar damb eth procés entath compliment dera sua foncion d’autoritat lingüistica dera varietat aranesa dera lengua occitana e d’aconselhadora sus eth tronc comun e estructurar era sua institucion entath compliment des punts prumèr e dusau des antecedents d’aguest convèni.
- Aconselhar ath Conselh Generau d’Aran en matèria de referéncia lingüistica der occitan e dera varietat aranesa tostemp que sigue requerit.
- Iniciar era elaboración d’un diccionari de concèptes dera varietat aranesa, en tot dar era máxima participación possibla.
- Destinar era aportacion económica deth Conselh Generau d’Aran a despenes diuèrses de foncionament e pròpies dera organizacion dera institucion.
En paraules deth sindic d’Aran, Carlos Barrera “damb era aprovacion deth Decret 12/2014 de 21 de gèr peth quau s’autregèc ar Institut d’Estudis Aranesi eth caractèr d’Academia e d’autoritat lingüistica der aranés, lengua pròpia en Aran e oficiau en Catalonha, s’obtenguec eth mès naut reconeishement entara nòsta lengua e possibilite ara Academia, creada per volentat deth Govern dera Generalitat de Catalonha e deth Conselh Generau d’Aran, era pervivéncia dera nòsta lengua, er aranés”.
Decret 12/2014, de 21 de gèr
Eth Decret 12/2014, de 21 de gèr, peth quau s’autrege ara Acadèmia Aranesa dera Lengua Occitana eth caractèr d’acadèmia e d’autoritat lingüistica der occitan, lengua pròpia ena Val d’Aran e oficiau en Catalonha ditz qu’era AALO a per objècte era nauta investigacion e estudi der aranés e er establiment des critèris de normativa d’acòrd damb es principis dera Gramatica occitana de Loís Alibèrt e es Normes ortografiques der aranés, coma part integranta der espaci lingüistic e culturau occitan. E qu’atau madeish, a de collaborar, de conformitat damb aguesti madeishi principis, damb entitats academiques, de recèrca o culturaus reconeishudes pes institucions publiques der espaci occitan, en establiment dera normativa lingüistica de referéncia entath conjunt dera lengua occitana.
Eth madeish Decret reconeish qu’era AALO ei era maxima institucion encargada d’establir e actualizar era normativa lingüistica der aranés e qu’ei era autoritat entar assessorament que, en matèria de lengua occitana, aranés en Aran, li sigue sollicitat pes administracions publiques e es organismes que ne depenen, e tanben pes centres d’ensenhament publics e privats e pes mieis de comunicacion de titularitat publica, d’acòrd damb er article 4 dera Lei 35/2010, d’1 d’octobre, der occitan, aranés en Aran.
Lei 35/2010, deth 1 d’octobre
Era Lei 35/2010, deth 1 d’octobre, der occitan, aranés en Aran ditz en article 4.4, qu’eth Conselh Generau d’Aran e era Generalitat de Catalonha an d’establir es sistèmes de collaboracion e d’assessorament de besonh entà garantir qu’es usatges lingüistics de totes es administracions publiques e des entitats autonòmes, es enterpreses e es autes entitats e institucions que ne depenen, e tanben des centres d’ensenhament publics e privadi e des mejans de comunicacion de titularitat publica, an de respectar es critèris qu’establisque era Acadèmia aranesa dera lengua occitana
Era Lei 1/2015, deth 5 de hereuèr (DOGC núm. 6810A, deth 13), deth regim especiau d’Aran, en Article 46. 1. ditz qu’era Acadèmia Aranesa dera Lengua Occitana ei ua corporacion de dret public independenta des administracions publiques, de caractèr academic e damb personalitat juridica pròpria.
Era AALO ei inscrita en Registre d’Acadèmies de Catalonha e ei era soleta Acadèmia en territòri aranés.
Puntuació: 4,00 de 5 - 1 Vots
Carregant ... - 1.785 visites[ Valora aquesta informació fent clic als estels ]
Si t'agrada aquest canal informatiu subscriu-te al RSS !
NOTA: El comptador de visites està actiu des de 02-2016
