Era Val d’Aran aumente era aucupacion toristica un 5% mès qu’er an 2015
Era Val d’Aran seguís creishent toristicament en ostiu.
Era conselhèra de Torisme e Desvolopament Economic d’Aran, Anna Díaz, a hèt un balanç dera sason d’ostiu ena Val d’Aran a on a enregistrat un increment de 5 punts mès qu’er an 2015 e 13 punts mès qu’er an 2014 en çò que tanh a aucupacion otelèra.
Per çò que tanh a dusaus residéncies, restaurants e comèrci estimam qu’an incrementat era sua activitat en lèu un 10%.
En servici d’informacion e acuelhuda ath visitant, es burèus de torisme an atengut a mès de 45.000 toristes.
Pònt de Sant Joan- Hèstes deth Huec Patrimòni dera Umanitat
Era sason d’ostiu comencèc damb eth pònt de Sant Joan en mes de junh qu’enguan coïncidie damb era declaracion pera Unesco des hèstes deth Huec (Arties e Les) coma patrimòni dera Umanitat. Eth mes de junh, era Val d’Aran enregistrèc un aument de 9 punts per çò que tanh ar an 2015.
Gessuda d’ua etapa deth Tour de França
Eth mes de junhsèga, era Val d’Aran acuelhec era gessuda d’ua des etapes deth Tour de França causa que permetec incrementar era aucupacion ena Val d’Aran, a on sonque aquera dimenjada, deth 8 ath 10 de junhsèga, era aucupacion siguec d’un 95,4% e er impacte economic totau en pernoctacions, restaurants, comèrci,… siguec d’1,2 milions.
Pròva Pilòt Trenet dera Artiga de Lin
Enguan s’a realizat ua pròva pilòt ena Artiga de Lin damb limitacion d’accès motorizat a un des paratges mès emblematics e concorrudi pendent er ostiu ena Val d’Aran a on se da era opcion de pujar a pè o ben damb un trenet. Eth tram delimitat ei de 2,8Km de 09:30 ores a 18:30 ores enquiath 12 de seteme.
En aguest accès i a un punt d’informacion a on deth 27 de junhsèga ath 31 d’agost s’an atengut a mès de 20.000 persones.
Damb aguesta pròva pilòt s’a evitat qu’uns 8.500 coches passèssen per aguest tram de pista.
En paraules dera conselhèra de Torisme e Desvolopament Economic d’Aran,Anna Díaz, “era Val d’Aran a estat reconeishuda coma ua destinacion sostenible e responsabla pes Naciones Unidas e considerèrem que damb aguesta pròva deth trenet era gent pòt gaudir deth paratge sense afluéncies de coches e ath delà, sense dobte s’a guanhat en qualitat medi ambientau”.
Aiguamoix- Banhs de Tredòs: accès a Colomers
Per çò tanh ar accès a Colomers, a on a compdar de hè ans er accès motorizat tanben ei restringit, en punt d’informacion s’an atengut a 13.900 persones e en an 2015 atengueren a: 8.212 persones.
Aran Park e es activitats de Rafting e Aran Natura, an registrat un aument d’entre un 8% e un 15% mès d’activitat.
Baqueira Beret, damb eth telesèra de Blanhiblar dubèrt, a obtengut un 10% mès de visites principauments eth mes d’agost.
Corsa 15 pòbles
Era corsa des 15 pòbles, qu’enguan a celebrat era sua XXau edicion, s’a assolidat coma un eveniment esportiu familhar.
Enguan a compdat damb 500 inscriti, e eth 65% des inscrits a estat gent de dehòra dera Vau d’Aran procedenti deth País Basc, Catalonha, Valéncia e França.
En paraules dera conselhèra, Anna Díaz, “coma nauetat, a compdar d’aguesta tardor s’a senhalizat era rota des 21km entà per’mor que toti es que volguen hèr aguest recorregut ac poguen hèr pendent tot er an, ja sigue entà entrenar o entà gaudir deth senderisme”.
Web de Torisme Val d’Aran e hilats sociaus
Era web de Torisme Val d’Aran a incrementat es visites per çò que tanh ar an 2015 en un 58%, en tot soslinhar era procedéncia de Barcelona o París.
En de hilats sociaus, Facebook a incrementat un 33%, Twitter un 24% e Instagram un 351%.
Inici sason de tardor
A compdar de mejans de seteme, era Val d’Aran començarà a préner es colors dera tardor un aute punt d’atraccion toristica qu’amassa damb era recuelhuda de misharnons pòden dar tanben bones chifres toristiques.
Tanben se trabalhe ena promocion dera sason d’iuèrn 2016-17 damb campanhes tant a nivèu nacionau coma internacionaus.
Era conselhèra Anna Díaz a soslinhat qu’ “era Val d’Aran aufrís un ample ventalh d’activitats dirigides ath torisme familhar, senderisme e BTT, e es chifres demòstren que cada viatge mès s’està desestacionalizant eth torisme”.
Puntuació: 4,00 de 5 - 1 Vots
Carregant ... - 1.046 visites[ Valora aquesta informació fent clic als estels ]
Si t'agrada aquest canal informatiu subscriu-te al RSS !
NOTA: El comptador de visites està actiu des de 02-2016
