Er aranés, Tòn Cónsul Vivar, en seminari de naut rendiment ISU de parelhes 2016
Se Tòn, de 18 ans, supère eth seminari, poderie començar aguest madeish ostiu era sua carrèra professionau en Canadà.
En Canadà se tròben es principaus campions espanhòus de patinatge artistic sus gèu: Javier Fernández (bicampion deth mon), Javier Raja, Sonia Lafuente, Celia Robledo e Luis Fenero.
Eth joen aranés, Tòn Cónsul Vivar, se tròbe en Berlin en tot realizar eth seminari de naut rendiment de parelhes dera Federacion Internacionau (ISU). Era parelha deth patinador aranés ei era canadiense, Alexane Bouillon, de 13 ans.
Eth passat ostiu, Tòn Cónsul, realizèc un stage en Montreal a on coïncidic dambBruno Marcotte, un des melhors entrenadors de parelhes deth mon. Era actuacion que realizèren Tòn e Alexane convencec a Marcotte e siguec clau entà qu’er aranés realize aguest seminari en Berlin. Marcotte Tanben ei convocat coma entrenador pera ISU en seminari.
Se Tòn supère eth seminari, aguest madeish ostiu poderie començar era sua carrèra professionau en Canadà (Montreal) jos es ordes de Bruno Marcotte, qu’actuauments a ena sua equipa ara parelha campiona deth mon 2016, formada per Meagan Duhamel e Eric Radford.
Jose Mª Cónsul, pair dera joena promesa dera elèit deth patinatge artistic a manifestat “a Tòn li agrade mès competir en parelhes, çò que passe ei qu’en Espanha non i a entrenadors d’aguesta disciplina e per açò competís en individuau. Ei ua grana oportunitat que se li presente e era vertat ei qu’ei emocionadissim damb poder anar tà Canadà”.
Tòn Cónsul Vivar, de 18 ans, becat peth Consell Català de l’Esport, residís des deth 2013 ena residéncia Blume (Barcelona) a on entrene individuau jornalièraments damb eth FCB ath costat deth sòn entrenador, Patrick Capmartin.
Tòn, signèc un convèni damb eth Conselh Generau d’Aran e Foment Torisme Val d’Aran entà promòir era destinacion toristica esportiua Val d’Aran peth mon, representada ena imatge e enes valors deth joen patinador, e dera equipa que hè part, mejançant eth patrocini institucionau.
En paraules deth vicesindic d’Aran e conselhèr d’Espòrts, Luis Carlos Medina “ei un orgulh veir era magnifica evolucion esportiua de Tòn Cónsul, eth sòn trabalh e esfòrç se ven recompensadi. Ei ua satisfaccion entara sua familha e entà toti es qu’èm ath sòn costat dant-li eth nòste supòrt veir coma arribe ath mès naut nivèu esportiu. Li desiram fòrça sòrt en aguest seminari”.
Puntuació: 4,00 de 5 - 1 Vots
Carregant ... - 1.184 visites[ Valora aquesta informació fent clic als estels ]
Si t'agrada aquest canal informatiu subscriu-te al RSS !
NOTA: El comptador de visites està actiu des de 02-2016
