Era Val d’Aran acuelh era Jornada Gestion multifuncional des auedaus
- Aguesta Jornada se tròbe laguens des “XXXIII Jornades Tecniques Silvicoles Emili Garolera” que se realizen en diferenti territòris enquiath 27 de mai.
Es Jornades Tecniques Silvicoles Emili Garolera se celebren per iniciatiua deth Consòrci Forestau de Catalunya (CFC) des deth 1984, en tot auer contribuït de forma decisiva en aumentar es coneishements forestaus practics de nombrosi silvicultors e professionaus. Eth Centre dera Proprietat Forestau, des dera sua creacion, a dat supòrt ara organizacion e difusion des Jornades. Egalaments, d’auti centres e entitats restacades damb eth sector forestau (CTFC, CREAF, UdL, estudis Professionaus, Escòles de Captacion Forestau, Associacions,…) collaboren en diferenta mesura ara realizacion d’aguestes Jornades.
Eth conselhèr de Territòri d’Aran, Jose Antonio Boya, a manifestat “aguestes Jornades dan ua formacion practica, çò de mès ampla possibla, sus era gestion des bòsqui e era silvicultura des diferentes espècies forestaus, e presenten in situ experiéncies relatives ara planificacion dera gestion, tractaments silvicoles, gestion e profitaments d’espècies forestaus, introduccion d’espècies e plantacions, alternatiues de gestion, mercats e productes,…”.
Jose Antonio Boya a hijut “pendent era Jornada d’aué, es assistents descorbiràn era importància des auedaus dera Val d’Aran tant ena sua extension coma enes profitaments hustèrs de tempsi passadi”.
Ena Val d’Aran se visitarà ua massa capitalizada d’auedaus fòrtaments afectada peth vesc (Viscum album) e se debaterà sus eth valor dera husta a pè, ath delà deth marcatge entà amiar a tèrme ua talhada de seleccion.
Posterioraments, s’anarà enquia ua zòna a on s’a realizat ua esclarida baisha, a on se poderà comparar er estat actuau damb er anterior, a on er auedau auie un anautit indèx d’ “esveltesa”, e se discutirà sus es accions hètes en tot tier en compde es condicionants climatològics, orografics e de mercat.
Entà finalizar, se visitarà ua zòna includida laguens es espacis catalogadi coma “Xarxa Natura 2000”, afectada per fòrts vents e era posteriora restauracion que s’amièc a tèrme, en tot èster aguestes accions es que se poderàn debàter en tot avalorar eth futur d’aguestes masses e es critèris a seguir entà hèr-les mès resistents ad aguesti fenomèns naturaus.
Es coordinadors dera Jornada ena Val d’Aran son: Gemma Arjó Rella, enginhèra Tecnica Forestau e tecnica forestau deth Conselh Generau d’Aran eÁlvaro Aunós Gómez, enginhèr de Forest Catedratic de silvicultura dera ETSEA (UdL)
Era Jornada ei organizada en collaboracion damb eth Collegi/Associacion d’Enginhèrs de Forests de Catalunya.
Puntuació: 4,00 de 5 - 1 Vots
Carregant ... - 1.194 visites[ Valora aquesta informació fent clic als estels ]
Si t'agrada aquest canal informatiu subscriu-te al RSS !
NOTA: El comptador de visites està actiu des de 02-2016
