Ues 3.000 persones ena finau dera Copa deth Mon de SBX FIS en Baqueira Beret
- 3.000 persones an seguit en dirècte er espectacle esportiu que s’a celebrat ena zòna Blanhiblar de Beret.
- Lucas Eguibar, rider dera RFEDI, a artenhut eth bronze deth circuit.
- Eth francés, Pierre Vaultier e era italiana Michela Moioli s’an proclamat campions deth Mon 2015-2016.
Era estacion dera Val d’Aran, Baqueira Beret, a amassat ues 3.000 persones qu’an gaudit en tot veir en dirècte er espectacle esportiu unic dera grana finau dera Copa deth Mon de Snowboard Cross (SBX) FIS que s’a disputat ena zòna de Blanhiblar de Beret.
Es espectadors an pogut veir sauts enes quaus es riders arribauen a volar enquia 25 mètres.
Es riders dera RFEDI, Lucas Eguibar e Regino Hernández, an artenhut era 3au e era 5au posicion respectivaments ena darrèra pròva deth circuit dera Copa deth Mon de Snowboard Cross. Eth francés Pierre Vaultier s’a portat eth Glòb de Veire en proclamar-se campion deth Mon. Eguibar, posseïdor deth Glòb de Veire dera passada sason a artenhut eth bronze deth circuit.
Era italiana, Michela Moioli, s’a proclamat era campiona femenina deth circuit de Copa deth Mon 2015-2016.
Tant eth director generau de Baqueira Beret, Francis Coll, coma eth president dera Reiau Federacion Espanhòla Espòrts d’Iuèrn (RFEDI), May Peus, an coïncidit en soslinhar era grana dimenjada ena Val d’Aran entàs espòrts d’iuèrn. An afirmat que s’an superat totes es expectatives previstes autant en volum d’espectadors coma en nivèu organizatiu en tot tier en compde qu’era carrèra s’a premanit en mens de 2 mesi.
Pera sua part, eth vicesindic d’Aran e conselhèr d’Espòrts, Luis Carlos Medina, a manifestat “entara Val d’Aran compdar damb ua pròva d’aguest nivèu ei un revulsiu entà mostrar-mos en mon coma destinacion esportiua de maximal interès. Auer era possibilitat de disputar un campionat deth mon de SBX e ath delà era finau d’aguest campionat ei ua grana oportunitat entà hèr conéisher Baqueira Beret e tota era Val d’Aran en païsi enes quaus d’ua auta manèra non serie possible”.
Medina a volut felicitar a totes es persones qu’an hèt possible que Baqueira Beret e era Val d’Aran agen pogut acuélher aguesta pròva.
En village, plaçat ena mèta, es assistents s’an trobat pendent era dimenjada de campionat enquia dotze carpes de diferentes mèrques entà mostrar ath public es darrères nauetats en materiau e tanben a estat ua excellenta oportunitat entà dar conéisher er inigualable entorn qu’entornege era estacion: era beutat deth païsatge, era riquesa deth patrimòni romanic e es exquisideses dera sua gastronomia, atau coma es multiples e atractiues opcions d’après-ski. Des deth village s’an divulgat es diferentes rotes e lòcs entà visitar e an pogut degustarproductes dera marca de garantia Val d’Aran, atau coma ua mòstra des plats tipics dera codina aranesa.
Puntuació: 4,00 de 5 - 1 Vots
Carregant ... - 1.095 visites[ Valora aquesta informació fent clic als estels ]
Si t'agrada aquest canal informatiu subscriu-te al RSS !
NOTA: El comptador de visites està actiu des de 02-2016
