Eth Conselh Generau d’Aran assomís era competéncia integra des emergéncies ena Val d’Aran
- Atau e coma mèrque er Acòrd Insistucionau de gestion integrau d’emergéncies en Aran, aprovat en 2019 pera Comission Bilaterau entre era Generalitat de Catalunya e eth Conselh Generau d’Aran, a compdar d’aué eth govèrn d’Aran comence a gestionar de manèra independenta e transversau es emergéncies en nòste territòri
A compdar de gèr de 2023, Pompièrs-Emergéncies e, per tant, tota era gestion des emergéncies ena Val d’Aran, passen a depéner unica e exclusivament deth govèrn deth Conselh Generau d’Aran, atau coma mèrque er Acòrd Institucionau de gestion integrau d’emergéncies en Aran, aprovat en an 2019 pera Comission Bilaterau entre era Generalitat de Catalunya e eth Conselh Generau.
“S’inicie ua naua etapa ena qu’eth govèrn d’Aran comence a gestionar de manèra independent es emergéncies en tot eth nòste territòri”, manifestaue era sindica d’Aran en tot híger que “damb aguesta gestion pròpria mos posicionam tanben coma un territòri de referéncia en aguest àmbit a trauès sustot dera nauta professionalitat, especificitat e rigor des nòsti professionaus qu’aguest nau sistèma mos permet”.
Ath long d’aguesti darrèri ans, eth Conselh Generau d’Aran a amiat a tèrme diuèrses accions entà poder desvolopar damb garanties eth nau modèl de gestion integrau des emergéncies en Aran: en matèria laborau, s’an amiat a tèrme procèssi de seleccion entà corbrir es diuèrses places que contemplaue eth nau modèl e s’a trabalhat entà poder arténher seguretat juridica entàs Pompièrs Volontaris, s’a implementat era Sala de Contròle Joan Canalias en Casau, qu’a supausat un important pas endeuant ena planificacion e coordinacion dera responsa as emergéncies, se trabalhe tanben ena licitacion integrau dera gestion der elipòrt entà qu’era Val d’Aran pogue compdar, de manèra definitiva, damb un elicoptèr de rescat e professionaus de manèra fixa en territòri, e s’a desvolopat un pionèr Plan Estrategic tara gestion sostenible deth regim de huec, que darà responsa as naui scenaris de cambi climatic e escalada enes generacions d’incendis, entre fòrça d’autes accions.
Era gestion dirècta de Pompièrs-Emergéncies per part deth Conselh Generau d’Aran permeterà aplicar ua tipologia de modèl unica, integrau e transversau, adaptada as besonhs e problematiques reaus deth nòste territòri, espezializada en airaus coma es rescats en montanha, era activitat en medi naturau o era gestion de cremes controlades, e que dongue responsa inmediata as emergéncies ena Val d’Aran.
Era sindica a volut “arregraïr ath còs de Pompièrs d’Aran, es sòns responsables e totes aqueres persones que, ath long d’aguesti darrèri ans, an possibilitat que pogam arténher aguest traspàs competenciau, que supause ua hita tant importanta entath nòste territòri”.
Puntuació: 4,00 de 5 - 1 Vots
Carregant ... - 372 visites[ Valora aquesta informació fent clic als estels ]
Si t'agrada aquest canal informatiu subscriu-te al RSS !
NOTA: El comptador de visites està actiu des de 02-2016
