Eth Conselh Generau d’Aran e es ajuntaments des municipis dera Val d’Aran an participat aguest maitin ena siesau jornada organizada pera Associacion Catalana de Municipis (ACM) qu’a per objectiu explicar es beneficis e es servicis qu’aufrís era Centrau de crompes deth mon locau.
Era jornada a servit entà amassar-se damb responsables de crompes e contractacion des entitats locaus dera Val d’Aran. Er acte s’a hèt ena sedença deth Conselh Generau d’Aran en Vielha, e a servit entà explicar eth catalòg de bens, servicis e subministraments qu’era Centrau de Crompes deth mon locau aufrís as entitats locaus, atau coma es nauetats ena matèria de contractacion a compdar dera Directiva 2014/24/EU de contractacion publica.
Er acte a estat inaugurat peth sindic d’Aran, Carlos Barrera e peth secretari generau dera ACM, Marc Pifarré. En discors inaugurau, eth sindic d’Aran, a arregraït era experiéncia dera Centrau de crompes dera ACM, “en favor dera realitat locau entà optimizar còsti e estauvis e tanben en favor dera realitat aranesa”.
Eth secretari generau dera ACM, Marc Pifarré, a soslinhat qu’un des objectius dera ACM “ei melhorar e atier encara melhor era realitat aranesa des dera Centrau de crompes. Hem era jornada en Aran pr’amor que mos interèsse fòrça agarrar e saber coma podem melhorar es nòsti servicis en aguest territòri”.
72% des ajuntaments catalans se beneficien dera Centrau de Crompes
Actuauments, era Centrau de Crompes deth mon locau, prebotjada pera ACM, compde damb 843 entitats locaus qu’aquerissen productes o servicis mejançant aguest pionèr sistèma. Se parlam d’Ajuntaments, 72% des municipis catalans ja i crompen. Aguesta chifra demòstre qu’ei era centrau crompes mès utilizada en Estat espanhòu.
Per productes, 646 entitats locaus se beneficien deth subministrament electric, 145 deth servici de gas, 358 deth servici d’assegurances, 59 crompen veïculs, 36 crompen equipes d’impression, 43 papèr, 4 maquinària tecnica e 85 contracten eth servici de prevencion de risqui laboraus.
3 municipis dera Val d’Aran
Ena Val d’Aran i a tres municipis que crompen bèth producte o servici des dera Centrau de Crompes deth mon locau. Concrètaments son es municipis d’Arres, Canejan e Les que se beneficien deth servici d’electricitat e assegurances.
Puntuació: 3,00 de 5 - 1 Vots
Carregant ... - 1.339 visites[ Valora aquesta informació fent clic als estels ]
Si t'agrada aquest canal informatiu subscriu-te al RSS !
NOTA: El comptador de visites està actiu des de 02-2016
