Eth Conselh Generau d’Aran, Torisme Val d’Aran e er Ajuntament de Naut Aran contunhen emparant e fomentant er espòrt d’elèit.
Er aranés, Ruben Caseny, formarà part dera equipa internacionau MASSI- KUWAIT CYCLING PROJECT
Ager dimèrcles, 13 
de gèr, s’aprovèc e publiquèc enes listes d’equipes continentaus UCI (Union Ciclista Internacionau) era naua equipa MASSI- KOWAIT CYCLING PROJECT, equipa ena quau formarà part er aranés, Ruben Caseny. Es institucions araneses (Conselh Generau d’Aran, Torisme Val d’Aran e Ajuntament de Naut Aran) ath costat dera mèrca catalana de biciclètes MASSI, an estat ua pèça clau ena creacion d’aguesta equipa, per auer aconselhat e emparat ara “Federacion de ciclisme de Kuwait” ena creacion d’aguest nau projècte.
Era equipa aurà era sua sedença en Kuwait, país que vò invertir e apostar peth ciclisme damb un projècte a long termini, mès compdarà damb un dusau blòc en Aran que garantisque era incorporacion ath ciclisme professionau de corredors aranesi, lheidatans e catalans. Aguesta equipa ja formèc part en aguesta categoria est an passat, mès enguan se renauís e s’a refortilhat damb naui patrocinadors e corredors europèus qu’aportaràn era sua experiéncia e coneishences.
Eth blòc europèu serà integrat, ath delà der aranés Ruben Caseny, peth lheidatan Marc Vilanova, er alacantí Axel Costa e er alemand Andreas Keuser, e d’auti europèus que s’incorporaràn enes pròplèus dies, e que participaràn principauments enes carrères dera peninsula e Euròpa Occidentau. Eth blòc damb sedença en Kuwait afrontarà es competicions deth Golf Persic, Asia e Euròpa der Èst.
Ruben Caseny, signèc un convèni damb eth Conselh Generau d’Aran entà promòir era destinacion toristica esportiua Val d’Aran peth mon, representada ena imatge e enes valors deth ciclista. “Qui melhor qu’es nòsti joeni esportistes professionaus aranesi entà representar eth nòste país e eth sentiment d’identitat” manifestèc Carlos Barrera, sindic d’Aran.
Puntuació: 4,56 de 5 - 9 Vots
Carregant ... - 1.766 visites[ Valora aquesta informació fent clic als estels ]
Si t'agrada aquest canal informatiu subscriu-te al RSS !
NOTA: El comptador de visites està actiu des de 02-2016
