Invesjove
Eth vicesindic d’Aran, Luís Carlos Medina, a assistit en INS d’Aran ara presentacion des trebalhs de recèrca e ara entrèga des diplòmes des IX Jornades Invesjove as alumnes de 2au de bachelierat.
Ar acte tanben an assistit eth director der INS d’Aran, Jose Manuel Rodriguez, er inspector deth Departament d’Ensenhament dera Generalitat de Catalunya, Joan Solsona, e era còsso d’Ensenhament der Ajuntament de Vielha e Mijaran, Maria Vergés.
Cada institut selleccione enquia 5 trebalhs de recèrca des presentats damb representacion des diferents modalitats de bachelierat. Es trebalhs són inedits e pòden éster individuaus o collectius, e er alumnat qu’age expausat eth sòn trebalh de recèrca rep un diplòma deth Departament d’Ensenhament.
Eth Departament d’Ensenhament dera Generalitat de Catalunya amassa damb es Servicis Educatius dera Val d’Aran, Alta Ribagorça, Pallars e Cerdanya reconeishen era importància dera investigacion e era comunicacion coma estrategia educativa entà potenciar es abilitats e es competéncies qu’an de perméter ar alumnat gestionar eth sòn aprenentatge de manèra autònoma. En aguesta linha se prepause ua seria d’actuacions, entà promòir e dar supòrt as centres e professorat damb es seguents objectius:
– Potenciar er escambi d’experiéncies enter diferents centres e poblacions deth Naut Pirenèu e Aran.
– Difóner es trebalhs de recèrca enter centres educatius e alumnes deth territòri.
– Proporcionar ar alumnat espleits entà mielhorar es competéncies comunicatives ara ora d’expausar eth trebalh de recerca.
– Facilitar ar alumnat modèls e estrategies entà elaborar e redactar un trebalh d’investigacion.
En paraules deth vicesindic d’Aran, Luis Carlos Medina, “ei fòrça important aguest moment d’eleccion tàs estudiants de 2au de bachelierat, pr’amor qu’an d’escuélher era sua carrèra universitaria e, eth sòn futur professionau. An de dedicar-se-i e contunhar damb er esfòrç qu’an destinat ar estudi enquiara, éster constants e motivadi e compdar damb era guida des professors e tutors entà hèr era eleccion mès adeqüada tath sòn futur”.
Luís Carlos Medina a hijut “i a fòrça talent ena Val d’Aran, s’a pogut vèir ena aguesta jornada a trauèrs des sòns trebalhs de recerca e aquerò hèr evident que tanben enes pòbles de montanha i a estudiants damb fòrça capacitat que non an de desbrembar es sòns origens”.
Tanben se realizat ua conferéncia en madeish INS d’Aran, “Er estudi dera nhèu ena Val d’Aran” a cargue deth tecnic responsable deth Centre de Lauegi d’Aran, Jordi Gavaldà.
Puntuació: 4,00 de 5 - 1 Vots
Carregant ... - 1.670 visites[ Valora aquesta informació fent clic als estels ]
Si t'agrada aquest canal informatiu subscriu-te al RSS !
NOTA: El comptador de visites està actiu des de 02-2016
