·         Demore restablert er accès ara Mina Victòria a toti es veïculs, tant torismes coma 4×4.

Eth Conselh Generau d’Aran, a trauès dera empresa Servicis Ambientaus dera Val d’Aran S. L. (S.A.V.A S.L), a amiat a tèrme eth condicionament dera pista d’accès ara Mina Victòria des deth pòble d’Arres enquiara bassa d’Arres e ara ja pòden accedir tant torismes coma 4×4.

Eth conselhèr d’Agricultura, Ramaderia e Medi Naturau d’Aran, Jose Enrique Arró, a explicat “era Mina Victòria ei integrada ath hilat museistic dera Val d’Aran e damb aguestes òbres facilitam e garantim er accès a un des paratges mès concorrudi deth nòste país en aguestes epòques der an”.

Era Val d´Aran a estat istoricaments ua zòna d’extraccion de mineraus. A començaments deth sègle XX s’inicièc era explotacion deth minerau de zinc ena zòna d’Arres e de Bossòst.

En an 1912, era Mina Victòria ja ère en plea explotacion, e se remassaue ath torn d’ueitanta tones de minerau brut per dia, e se metec en foncionament un lauader de mineraus en Bossòst. Ena mina trabalhauen entre 100 e 150 persones, entre er interior e er exterior des galaries.

Ena Guèrra Civiu (1936-1939), se suspeneren es trabalhs. En 1949 se reinicièc era explotacion, enquiar an 1953, quan era baishada deth prètz deth zinc e era manca de man d’òbra provoquèren eth barrament definitiu des mines.

Informacion sus er itinerari Mina Victòria:

–       Rota a pè

Distància: 3 km

Durat: 2-3 ores

Era visita guidada includís era entrada as galaries.

–       Servicis:

Centre de visitants, visites guidades, zònes de picnic.

ORARIS:

Enquiar 11 de seteme: Toti es dies d’11:00 a 15:00 ores

Prètz: 3€

Mès informacion:

MUSÈU DERA VAL D’ARAN

Tel. 973 641815

info.museu@aran.org