Eth Conselh Generau amiarà a tèrme òbres d’accessibilitat en campanau de Sant Andrèu de Salardú
- Actuaument, er accès en campanau dera glèisa de Sant Andreu se trape en molt mau estat, arribant a èster perilhós, e damb aguestes òbres d’accessibilitat non sonque se garantirà era seguretat des persones, en tot perméter qu’eth campanau sigue visitable, senon que tanben se meterà en valor era estructura de husta deth sòn interior, d’un naut interès arquitectonic e istoric
Enes pròplèu setmanes, eth govèrn deth Conselh Generau d’Aran iniciarà es òbres d’accessibilitat ath campanau dera glèisa de Sant Andrèu de Salardú. Er objectiu d’aguesti trabalhs ei dotar ath campanau d’ues condicions d’accès segures, pr’amor qu’ena actualitat se trape en molt mau estat, arribant a èster perilhós. Es actuacions que s’amiaràn a tèrme cerquen respectar era estructura d’òbra e, sustot, méter en valor es estructures de husta d’aguest campanau, que son d’un naut interès arquitectonic.
“Eth govèrn deth Conselh Generau d’Aran ei totaument comprometut damb era proteccion deth nòste auviatge e, mejançant actuacions coma aguesta, cerque méter en valor es nòstes glèises e monuments, que son ua part importanta dera nòsta cultura e es nòstes tradicions”, afirmaue era sindica d’Aran, Maria Vergés.
A despièch qu’era òbra de fabrica dera tor-campanau se consèrve en bon estat, en interior, es disparièrs trams d’escala e es hargats de husta se trapen fòrça maumetudi, çò que hè perilhós er accés e impossibilite eth mantenement des campanes e d’autes installacions que i a en pis superior, comportant eth deteriorament generau e era pèrta totau d’usatge dera bastissa.
Ath delà, en amiar a tèrme aguestes actuacions de melhora, eth campanau dera glèisa de Sant Andrèu serà visitable entath public generau, en grops redusidi e guidadi. Aguesta infraestructura a un gran interès arquitectonic e istoric, non sonque pr’amor dera òbra de fabrica, senon tanben, e de manèra plan especiau, pr’amor des estructures interiores de husta, ath delà d’auti elements de naut interès coma son eth mecanisme deth relòtge deth sègle XVIII o es pròpries campanes.
Era actuacion a un còst de 174.838,66 € recèp finançament dera Diputació de Lleida, era Generalitat de Catalunya e er Ajuntament de Naut Aran.
Puntuació: 4,00 de 5 - 1 Vots
Carregant ... - 966 visites[ Valora aquesta informació fent clic als estels ]
Si t'agrada aquest canal informatiu subscriu-te al RSS !
NOTA: El comptador de visites està actiu des de 02-2016
