Black Mountain Bossòst arribe en seteme ara 5au edicion
Novèla, gastronomia, senderisme, opèra, fotografia e autors coma Baltasar Garzón, Juan Madrid, Paz Velasco e Mariano Sánchez Soler se daràn citat en hestivau culturau
Black Mountain Bossòst (BMB), er hestivau culturau sus genre nere, arribe en seteme (deth 6 ar 11) ara cincau edicion. Aguesta trobada, neishuda en municipi de Bossòst, non s’arturèc en 2020, a despiech dera pandemia, e enguan persute en hèr-se un lòc subergessent en panorama culturau. Atau ac an destacat, ena presentacion deth BMB qu’auec lòc diuendres ena libreria Documenta, de Barcelona, tant eth comissari, er escrivan José Luis Muñoz, coma er alcalde de Bossòst, Amador Marqués, tà qui, ath delà, “er hestivau supòse tanben un recors toristic de prumèr orde en uns moments en qué era nòsta destinacion s’a de reinventar e apostar mès per aguest tipe de propòstes, centrades ena excelléncia”.
Bona pròva der interès que drevelhe er hestivau son es 50 novèles presentades ath Prèmi BMB 2021, era màger part d’autors damb òbra dejà publicada, segontes a revelat er escrivan José María García Sánchez. Presentaràn era sua òbra autors coma Juan Madrid (Gloria bendita), Mariano Sánchez Soler (Los ricos de Franco) e Baltasar Garzón (La encrucijada). Es collòquis tornaràn a desvolopar tèmes d’interès, coma es ments criminaus e eth foncionament deth cervèth d’un psicopata, damb era criminològa Paz Velasco. En BMB, preneràn part es escrivans de Bossòst Tess Lorente e Juan Francisco González Subirá.
Eth critic Manuel Quinto a dat compde, ena presentacion, des cicles de cinema qu’er hestivau dedicarà as escrivans John Le Carré e Patricia Highsmith. Ath delà, gastronomia, senderisme, jazz, enguan tanben opèra e fotografia, se daràn cita en aguest programa fòrça complèt, qu’un an mès mos aufrís eth BMB. Aguest hestivau ei organizat pera associacion Lee o Muere e er Ajuntament de Bossòst, entestadi peth comissari José Luis Muñoz e era sotscomissària Lluna Vicenç, damb eth supòrt der Ajuntament de Vielha-Mijaran, eth Conselh Generau d’Aran e era Deputacion de Lleida e era collaboracion de diuèrses enterpreses dera localitat e deth món culturau.
Puntuació: 4,00 de 5 - 1 Vots
Carregant ... - 999 visites[ Valora aquesta informació fent clic als estels ]
Si t'agrada aquest canal informatiu subscriu-te al RSS !
NOTA: El comptador de visites està actiu des de 02-2016
